التقديم على الشغل بفاعليه خارقة


طيب يا جماعة بما ان السؤال لسه بيتكرر كتير

المشكلة

انا عملت كل حاجة على المواقع ديه وبرضو مفيش فايدة الاكاونت بتاعى 100% واخدت اكتر من امتحان وحطيت بورتفليو لكذا حاجة عملتها وكتبت وصف ممتاز للاكاونت بتاعى لكن برضو مفيش فايدة. بقدم على شغل ومبتقبلش. حتى انى بعرض اقل من نص الثمن.
 
كل ما سبق ده ممتاز جدا وهو بالفعل خطوات فى اتجاه انك تتقبل فى الشغل اللى بتقدم عليه. لكن لازم تراعى ان نسبة العملا الجداد على الموقع ممكن ممتعداش 20% . وان باقى ال 80% فى الغالب يستعينوا بنفس الفريلانسرز اللى عملولهم شغل قبل كدة.
 

بتقول كده ليه يا عم عشان تحبطنا ؟

لا والله. بس مينفعش اقولك انزل عدى البحيرة ديه مشى وانا عارف انك مبتعرفش تعوم وتنزل تلاقيها غريقة وتغرق لما تعرف من الاول هتعمل حسابك وهتعرف انت محتاج ايه عشان تعدى بسلام.
طيب انت هتستعد ازاى بقى فى بحيرة الفريلانسرز اللى من الهند وغيرها وخاطفين شغل اد كدة من العملا.
اولا كدة لازم تعرف ان فى فن التقديم على شغلانة مش معنى انك نزلت سعرك الارض ان خلاص كده انت عملت كل اللى عليك وزيادة . لا يافندم فيه حاجات كتير اوى لسه ممكن تعملها هنقولها كمان دقيقة. 
بس الأول لما تسمع حد يقولك متنزلش من سعرك وانت بتبدأ واعمل لنفسك قيمة. الكلام ده غلط تماما. لا يافندم نزل من السعر براحتك حتى لو وصلت انك انت اللى اتدفع للعميل. ايوه زى ما قرأتها كده فيه ناس بتفضل شهور على مواقع العمل الحر على ما تقلاى اول شغلانه وفيه ناس بتشتري تقييمات عشان بروفايلاتها تشتغل بل ان فيه ناس بتشتري وتبيع فى بروفايلات جاهزة عليها تقييمات عشان تقصر المدة ديه. طبعا كل ده غلط ومننصحش بيه بس بنذكرة عشان نوضح ان انت لما بتقلل من سعرك انت بتشتري ف ىالمقابل تقييم كويس من العميل يعنى الفلوس اللى قللتها انت فى الحقيقة هتاخد بدلها تقييم ده اهم من اى فلوس لاى مبتديء.

خطوات تقوية فرص القبول عند التقديم فى أى وظيفة

1- قدم على الوظيفة خلال 5 دقايق من نزولها.

انت مثلا بتشتغل تصميم اغلفة كتب فبتعمل بحث بكي وورد (book cover) فى صفحة السيرش خليك فاتحها حضرتك وانت بتعمل اى حاجة تانية وكل كام دقيقة اعمل ريفريش للصفحة عشان تشوف اخر حاجة نزلت وتقفشها وتقدم قبل اى حد تانى. الهدف هنا اننا نحاول نقدم على بالكتير فى اول 5 قدموا على الشغلانة. لان العميل غالبا مشبيكون ليه طولة بال يشوف اكتر من كدة خصوصا لو لقى حد مناسب فى اول 5.
 

2- حاول تدور وتركز على الشغل الجاهز .

بمعنى:  فيه عميل بيقول انا عايز تصميم غلاف للكتاب بتاعى ولما الاقى مصمم كويس هبعتله التفاصيل . سيبك منه هتضيع كونيكتس التقديم وفى الاخر تلاقى تفاصيل هتخنقك فى عيشتك وتاخد وقت كتيييير لو كان الشغل بسط مكانش قال كده اصلا. وفيه عميل تانى تلاقيه كاتب وصف الشغل بكل دقة بحيث انك ممكن متحتجش تكلمه اصلا عشان تعمل الشغل يقولك انا عايز تصميم كتاب بعنوان كذا واسم الكاتب كذا والكتاب بيتكلم عن كذا كذا وتلاقيه كمان حاططلك امثلة لصور اغلفة كتب عاجباه. ده حصرتك تلقفه كده اول ما ينزل الاعلان وتقرا بتمعن كويس جدا وبسرعة جدا شغله.
 

3- اتاكد وانت بتقدم ان انت مطابق للمواصفات اللى العميل عايزها.

يعنى لما يكون انت مستواك مبتديء او تحت متوسط والعميل طالب حد عنده خبرة عالية متتصورش انك ممكن يقبلك لا بنسبة 80% هيرفضك ولو قبلك لانه ميعرفش مستواك غالبا مشهتعرف ترضي تطلعاته وبالتالى هتاخد فيد باك وحش. من الاخر هتبقى بيعه مفيهاش منافع 🙂
وساعات بيكون عميل عايز فريلانسر من بلدة مش لسبب غير انه بيحب ينفع ولاد بلده فطبعا لو مش من بلدنا منقدمش.
 

4- بعد بقى ما قريت وصف الشغلانة كويس نيجى بقى لل Cover letter

اكبر غلطة ممكن اى حد يعملها انه يعمل واحد ثابت وياخده كوبي بيست لكل شغلانه بيقدم عليها.
غلطة تانية شائعة ان الفريلانسر بيسهب فى التعريف عن نفسه. (انا فلان الفلانى خريج كذا وواخد كورسات فى كذا وشغال بقالى كذا) ولما ييجى يتكلم ف ىالشغل سطر وشكرا.
الصح اننا نسهب اكتر فى الكلام ف ىالشغل نفسه تاكد ان انت اتكلمت فى تفاصيل الشغل اللى هتعملوا للعميل وعرفوا انت ناوى تعمله ازاى. وفكر معاه فى طرق تخليه يوصل للناتج اللى هو عايزه بشكل افضل.
فى مثالنا هنا عميل طالب تصميم 2D لغلاف كتاب عشان يعرض بيه الكتاب على موقع امازون. هنا ممكن تقوله مصلا انك هتنزل عشرات الصور المتعلقة بموضوع الكتاب للاختيار ما بينها الانسب للتصميم. ممكن تقوله كاقتراح انا ممكن اعملك كمان 3D Mockup للتصميم وده هيخلي شكله فى امازون احسن. يعنى ادخل جوا دماغ العميل وحسسه ان انت عايش معاه فى الموضوع بتاعه وبتجتهد عشاان تخليه يوصل حتى لحاجة احسن من اللى كانت فى تصوره.
 

5- اكتب الـ  Cover letter فى أقل من 10 دقائق

انا عارف ان اللى انا قلتلك تعمله فى كتابه ال Cover letter كتير وهياخد منك وقت كتير عشان تعمله. بس للاسف مفيش وقت كتير. درب نفسك تكتب بسرعة وتترجم بسرعة لو كلمة مشعارفها خلى القاموس جاهز ورتب الكلام والافكار بسرعة فى دماغك واكتبها بسرعة وبعدين راجعها مرة واحدة وابعت. وبقول مفيش وقت لان فيه ناس وحشين 🙂 بياخدوا كوبي بيست ويقدموا فدول هيسبقوك فكل ما تتاخر عدد التقديمات قبلك هتزيد وده هيضعف فرصك جدا. (افتكر اننا عايزين نظهر من ضمن اول 5 قدموا على الشغلانة)
 

6- فكر برا الصندوق.

اعمل فيديو يعرض خدمتك وشغلك

لو انت تخصصك تصميم كتب. فكر تعمل فيديوا بيقدم خدمتك ويوصفها ويصورها كمان اثناء تصميمك لاحد الاغلفة. عادى لو متعرفش اشتري الخدمة من حد. انت بتستثمر واللى بتدفعه هيرجعلك. زى بالظبط اللى بيفتح محل ويملاه بضاعه هل هو ضامن الزباين ؟؟؟ متخافش من المجازفة ولازم تخسر عشان تكسب ولازم تقع عشان تقف كويس ولازم تتخبط عشان تشوف كويس.
ممكن الفيديو يكون (white board animation) اللى هو فيديو فيه صفحة بيضا وايد بتكتب وترسم عليها مع شرح بالصوت او قراءة للكلام وتوضيح.
ممكن الفيديو يكون تسجيل فيديوا ليك بعد ما قرأت الوظيفة تسجل مقطع من دقيقة تقول للعميل اهم النقط اللى انت هتعملها عشان تخلى شغله بيرفكت. (لو انت قوي فى الانجليزى) بس هنا ابقى جهز برنامج لضغط الفيديو عشان
ميبقاش حجمة كبير لما تبعته للعميل.

اعمل صفحة فيس بوك لخدمتك

اعمل صفحة على الفيس نزل فيها شغلك. سامع واحد بيقول انا لسه مبتدئ مليش شغل. مشهسيبك وربنا 🙂 عين نفسك واعمل شغل. مش احنا قلنا فيه شغل بيكون جاهز وهو ده اللى نقدم عليه. خد كام شغلانه من دول واعتبر انك قبلت فيها واعملها واعمل نفسك عميل رخم وشوف هتعجبك ولا لا وخد رأى صحابك او حد خبرة فيها لو امكن وفى الاخر نزلها على صفحتك. اعمل كده كذا مرة طول ما انت قاعد فاضى ونزل على صفحتك لحد ما تملاها.

ادخل مسابقات

لو انت مجالك ينفع زى التصميم وانسب مكان للمسابقات هو موقع فريلانسر دوت كوم المسابقات هتتعلم منها كتير لانك هتشوف تصميمات المنافسين للشغل نفسه. وكل تصميم هتدخل بيه مسابقة سواء كسبت او مكسبتش طبعا انا عارف هتاخده على صفحتك كعمل سابق. مفيش حاجة عندنا بتترمي يافندم. وفيه مواقع تانية كتير للمسابقات زى 99ديزاين وديزاين كراود بس دول شروطهم صعبة لقبول المشاركات فى المسابقات لكن فريلانسر اى حاجة هترفعها هتتقبل عادى 🙂 . يعنى عك براحتك مفيش فيد باك. العميل اخره يشتم بس ههههه . 
الافكار برا الصندوق كتير جدا بس انت اطلق العنان لخيالك وخلى حدودك السما 
 

7- بيهانس

اللى ميعرفش بيهانس ده موقع بيسمحلك تعمل بورتفليو تحط فيه شغلك السابق وتعرضه بشكل مميز. اعمل حساب على بيهانس مينفعش مصمم ملوش حساب عليه بصراحة. وحط كل شغلك اللى فى الصفحة اللى عملتها فى رقم 6 عليه.
 

8- متلزقش على موقع واحد.

ناس كتير جدا غالبا بيكونوا فاهمين ان العمل الحر على الانترنت = ابورك بس او موقع فريلانسر بس. 
على فكرة بقى انا كمحمود منصحش حد يشتغل لا على ابورك ولا على موقع فريلانسر دوت كوم. لان الاول هيزهقك فى عيشتك ويعقدك لمجرد بس انك تعمل بروفايل عنده وحتى لو ليك بروفايل شغال هيقرفك وممكن تلاقيه قفلهولك بحجة انك بتقدم على شغل!!!! اما موقع فريلانسر دوت كوم بقى ده ساااااااحر ممكن بقدرة قادر يكون ليك 200$ عليه وتغيب كام شهر لظروف وترجع تلاقيهم بقو 5$ وممكن كمان تلاقيهم بالسالب. ايوه والله بالسالب انا رصيدى دلوقتى على الموقع -22$ يعنى مديون مع انى مشتغلتش عليه غير مسابقات بس والحمد لله مكسبتش حاجة غير انى اتعلمت تصميم بيها و 7 ونص $ الحمد لله اخدوهم وعليهم بوسة اهو .

مواقع العمل الحر على الانترنت عددها كبير جدا

فيه اكتر من 1000 موقع عمل حر على الانترنت منهم فايفر وجورو وبيبول بير هاور وخمسات ومستقل. ده حتى وزارة الاتصالات المصرية عملت موقع مصري. فيه حتى مواقع مصرية بتديلك الارباح عن طريق فودافون كاش. والله الهنود نفسهم عملولك موقع باللغة العربية. فيه مواقع بالعربي متخصصة فى التصميمات بس زي بيكاليكا وفيه مواقع عربى تانية متخصصة فى حاجات تانية. استكشف ودور. (اشهر 10 مواقع عمل حر عربية
انا بجد مشقادر افهم الناس خايفين ليه. التاجر ممكن يكون عشان بيحط فلوسه فى تجارته فبيخاف يخسرها لو التجارة خسرت. لكن انت بتسجل على الموقع من دول ببلاش ومبتدفعش ولا مليم واصلا انت فاضي غالبا طول الوقت على الفيس. ايه اللى انت خايف تخسره بالظبط لو دخلت على موقع عمل حر جديد استكشفت فيه بنفسك ومستنيتش تسأل 500 واحد جربوه قبل كدة ؟ ولو ملقيتش حد جربه تسيبه وتبعد عنه. ما هو لو كل الناس بتفكر كده مكنش حد عرف المواقع اللى احنا شغالين عليها ديه اصلا . أهم حاجة انك بس متصدقش اللى يوهمك ان الشغل على المواقع اللى بتوعد بربح كبير وسريع بدون تعب وميز المواقع والمجالات اللى الشغل فيها بيعتبر تضييع وقت او نصب.
 

9- سياسة استخدام مواقع العمل الحر

ضيع شوية وقت واقرا سياسة استخدام الموقع اللى هتشتغل عليه بتمعن واعتبر نفسك بتمضى عقد مع شركة جديدة. هل ينفع تدخل تشتغل فى شركة وتمضي على عقد منغير ما تقراه؟؟؟ لان مثلا فيه مواقع مينفعش معاها بعض الطرق اللى احنا قلناها فوق ومثال على كده موقع خمسات اللى ممنوع فيه انك تحط روابط خارجية وبالتالى لو ليك صفحة عل ىالفيس او اكاونت علي بيهانس مشهتقدر تحط لينك ليه على خمسات. فممكن تعمل كده لو مقرأتش الشروط وتلاقيهم قفلوا حسابك. وفى الحالات ديه المواقع ديه معندهمش وقت انهم يسمعوك لما تقولهم مكنتش اعرف الحساب بيتقفل وشكرا ومشهتعرف تعمل غيره فى مواقع كتير لان ببساطة لما بيكتشفوا تطابق بيانات حسابين بيقفلوا الاتنين بدون اى تفاهم وهتدخل نفسك فى دوامة ملهاش لزمة عشان وفرت على نفسك ساعة واحدة بس تقرا فيها الشروط مرة واحدة فى العمر.
 
 
 

أضف تعليقاً