سلسلة دروس كيفية الربح من الانترنت بالعمل على موقع فايفر (الجزء الثالث)


سلسلة دروس كيفية التسجيل والعمل على موقع فايفر

الجزء الثالث(الترويج للخدمة وطلبات المشترين)

أولا طلبات الخدمات Buyers requests

قلنا قبل كدة إن بالرغم إن الأصل فى موقع فايفر إن الفريلانسر هو اللى بينزل خدماته على هيئة Gigs والعميل اللى هو المشتري بيدور على الخدمة الأنسب ليه ما بينهم. إلا إن الموقع بيسمح فى نفس الوقت للعميل اللى وقته ضيق إنه ينزل طلب خدمة فى صفحة إسمها صفحة طلبات المشترين Buyer requests والفريلانسرز بيدخلوا يقدموا عروضهم عليها.

بس مهم هنا نعرف إن طلبات المشترين اللى بتظهر لك فى صفحة ال Buyer requests بتكون فى التصنيفات فقط اللى انت عامل Gigs فيها. يعنى مثلا إحنا عملنا فى الجزء الثانى Gig لخدمة تصميم لوجو. بالتالى لما ادخل على صفحة طلبات المشترين كل اللى هيظهرلى الطلبات المتعلقة بتصنيف التصميم والجرافيكس فقط. عشان كدة من المهم إن كنا نتقن مهارات لاكتر من تصنيف اننا نعمل Gig لكل منها ونتيجة لده هيظهرلك فى صفحة طلبات المشترين عدد أكبر من طلباتالمشترين.

عشان ندخل على صفحة طلبات المشترين Buyer requests من الصفحة الرئيسية لفايفر هندوس على قايمة Selling  من أعلى يمين الشاشة زى ما فى الصورة 1 ونختار Buyer requests.

Buyer requests
صورة 1

هتفتح صفحة طلبات المشترين وهتبقى بالشكل اللى فى الصورة 2

best fiverr guide - buyer request
صورة 2

عشان نقدم عرض على أى طلب منهم هنقف عليه بالماوس هيظهر على اليمين كلمة Send offer زى اللى فى الصورة هتدوس عليها.

هتظهر شاشة زى الصورة 3

Best fiverr guide - buyer requests
صورة 3

فى الصورة هيظهر كل ال Gigs اللى احنا منزلينها وهنختار منهم ال Gig اللى من نفس نصنيف الخدمة الخاصة بتصميم اللوجو.

بعد ما نختار ال Gig اللى هنقدم على أساسها العرض هتظهر الشاشة ديه (صورة 4)

best fiverr guide
صورة 4

وهنكتب فيها تفاصيل العرض بتاعنا ونختار الوقت اللى هسنلم فيه الشغل والمقابل المادى ونحدد عدد مرات المراجعات والاضافات اللى هيشملها العرض.  فى الاخر هندوس Submit Offer وبكدة يبقى احنا قدمنا عرضنا على طلب المشتري. وزى ما قلنا قبل كدة لينا حدود نقدم على 10 طلبات يوميا فقط.

ثانيا الترويج للخدمة ونشرها

شوفنا قبل كدة فى اخر الجزء التانى ازاى بعد ما بنحط Gig جديدة بننشرها على الوول بتاعنا على الفيس بوك.

وده كفيل انه يخليها تظهر لكل الاصدقاء على الفيس بوك. لكن نادرا ما بيكون بين الاصدقاء عميل محتمل انه يشترى الخدمة بتاعتك. بالعكس ده ممكن يطلبها منك كخدمة بدون مقابل لانكم صحاب بقى وكدة.

الطريقة الأفضل لإنك تنشر الخدمة بتاعتك واللى تطرقنا ليه بشكل سريع فى اخر الجزء التانى هى انك تعمل حساب ليك على كل مواقع التواصل الاجتماعى الي شوفناها فى الصورة ديه.  وهى فيس بوك وتويتر وجوجل بلس ولينكد ان.

Best Fiverr guide - Its Alive
صورة 5

ولأن الفيس بوك هو من اشهر مواقع التواصل الاجتماعى واكترها انتشارا واستخداما فى التسويق اللكترونى فهيكون اكتر تركيزنا عليه.

الترويج للخدمات على الفيس بوك

مبدأيا كدة متفكرش تنشر الGigs بتاعتك على صفحتك الشخصية إلا لو كان حساب الفيس بوك بتاعك ده انت عامله لغرض الشغل اصلا ومعظم اللى عليه ناس بتتاعمل معاهم فى شغل وا عملاء محتملين لشغلك. غير كدة اصدقائك هيتخنقوا منك ويعملولك Unfollow أو حتى Unfriend  والاتنين هيكونوا حاجة مضرة ليك بعد كدة. ممكن تعمل حساب جديد يكون خاص بالشغل بس تضيف عليه بس الاصدقاء اللى شغالين معاك فى نفس المجال او اى عميل اتعاملت معاه عن طريق الفيس بوك او الاعضاء فى الجروبات المهتمة بنفس الشغل.

الاستراتيجية اللى هنمشي عليها هى بسيطة جدا لكن فيها جزء صعب شوية.

ببساطة هنبحث عن كل الجروبات الموجودة على الفيس بوك اللى ممكن تكون مخصصة لنشر الـ Gigs والترويج ليها. وهنبدأ بتقديم طلب انضمام للمجموعات اللى فيها عدد اعضاء اكبر عشان لما ننزل بوست عن الGig بتاعتنا نضمن يوصل لاكبر عدد ممكن.

 ولحسن الحظ فى عشرات من الجروبات ديه وتسهيلا عليكم انا جمعت قايمة بمجموعة كبيرة تضم اكتر مجموعات الترويج للGigs من حيث عدد الأعضاء. وإليكم القائمة:

قائمة بمجموعات الفيس بوك المخصصة للترويج لخدمات فايفر
https://www.facebook.com/groups/MyFiverrGigs/https://www.facebook.com/groups/FiverrGigsNetworkhttps://www.facebook.com/groups/1762397437372875/https://www.facebook.com/groups/FiverrPakistan/https://www.facebook.com/groups/fiverrhelpbangladesh/https://www.facebook.com/groups/fiverr.help.2015/https://www.facebook.com/groups/fiverr007/https://www.facebook.com/groups/1462836250599476/https://www.facebook.com/groups/Fiverrnetwork/

– وده جروب جديد انا عملته لما لقيت فيه مجموعات متقسمة حسب البلد ففكرت اعمل جروب يبقى عليه المصريين بس هم اللى ينزلوا اعلانهم واى جنسية تانى ممكن يدخل الجروب كعميل محتمل لكن مينزلش اعلانات لل Gigs  بتاعته

https://www.facebook.com/groups/408381842578765/

كل جروب من اللى فى القايمة ديه فيه اكتر من 10000 عضوا يعنى مجموع الاعضاء فى الجروبات ال 10 اكتر من 100 الف عضو. فاذا فرضنا ان نسبة الاعضاء المتفاعلين على الجروبات ديه هى فى المتوسط 5% مثلا فده معناه ان البوست اللى بتنزله على اى جروب منهم فيه ال Gig بتاعتك بيوصل على الأقل ل 5000 عضو. طبعا ده افضل 100 مرة من انك تنزل الGig بتاعتك على الموقع وتسيبها منغير تسويق.  ولاحظ ان انت المفروض تنزل بوست كل يوم او بوستين فى اليوم على الجروبات ديه كلها يعنى مش اول مرة وخلاص. ده بيزود فرص ان عدد اكبر من العملا المحتملين يشوفوا بوستاتك.

طيب دلوقتى لو لاحظنا ان الجروبات اللى فاتت ديه عملها اصحابها عشان ينشروا عليها ال Gigs لكن نتيجة لده عدد العملا المحتملين عليها قليل نسبيا. بس ده مش هيمنع اننا ننشر خدماتنا عليها. لكن …

المجموعات الآخرى التى يمكن النشر فيها

كل مجال من مجالات العمل الحر ليه جمهور العملا بتوعه فمثلا اعمال تصميم الشعارات وكل تصميمات الى تندرج تحت هوية تجارية للشركة من تصميم كروت تعارف لتصميم لوجو وأظرف وجوابات وبانرات واغلفة صفحت سوشيال ميديا غالبا بيكون جمهورها من اصحاب الاعمال الناشئة حديث او فى طور الانشاء. رسم الشخصيات الكرتونية والحيوانات  على الكمبيوتر بيكون جمهورة فى الغالب مؤلفين قصص الاطفال وروايات الاطفال. وهكذا.

المهم دلوقتى اننا ندرس المجال اللى احنا شغالين فيه ونعرف مين هما المهتمين بشراء الخدمات اللى فى المجال ده ومين هما اللى بيدوروا على حد يشتروا منه خدمات زى اللى انت بتقدمها. وبعد كدة هتعطلع الكلمات المفتاحية اللى هتبحث بيها عن مجموعات الفيس بوك الخاصة بالناس ديه وتعمل طلب انضمام ليها.

بس خلى بالك كويس فى الحالة ديه النشر مش هيكون بنفس طريقة المرحلة اللى فاتت لان فى المرحلة اللى فاتت ديه كلها كانت جروبات اصلا هدفها انك تنزل اعلانك عليها لكن المرادى انت هتدخل على جروبات غالبا النشر فيها ممكن يكون ممنوع او عليه قيود. فلازم هنا تقرا اول مرة بس قواعد كل مجموعة تنضم ليها. وحتى المجموعات اللى بترفض الاعلانات ممكن تتابع البوستات اللى عليها من وقت للتانى بحيث لو لقيت بوست بيسأل عن خدمة من اللى انت بتقدمها ممكن تدخل تعرض خدمتك وتحط تحتا لينك لل Gig بتاعتك. وده مفيش ادمن ممكن يعترض عليه. وهتلاقى بعض المجموعات بتسمح بنشر الاعلانات بس بقيود فمهم تقرا وصف كل مجموعة عشان تعرف قواعدها.

طبعا انا مشهقدر احط هنا قايمة بكل المجموعات الخاصة بكل تصنيفات الشغل لان التصنيفات ديه اكتر من الف لوحدها. وطبعا نا معرض غير فى المجالات اللى انا مهتم بيها بس. لكن فى الغالب معظمكم هيكون عارف مين ممكن يكون مهتم يشترى الخدمة اللى بيقدمها. وحتى اللى ميعرفش الامر مش هيكون محتاج اكتر من بعض البحث على الانترنت وده اللى انا بعمله.

كيفية النشر من فايفر على جروب على الفيس بوك

طيب السؤال دلوقتى اذاى انشر ال Gig  بتاعتى على جروب فيس بوك اصلا ؟

هنرجع للصورة رقم 16 من الجزء التانى والخطوة اللى نشرنا فيها الخدمة على الوول على صفحتنا الشخصية على الفيس بوك. (صورة 6)

Post Gig to Facebook
صورة 6

المرة اللى فاتت ضغطنا مباشرة على Post to Facebook دلوقتى قبل ما هنعمل كدة هنضغط على القايمة اللى فوق على الشمال تحت شعار الفيس بوك اللى مكتوب عليها Share on your own Timeline. هتفتحلنا القائمة اللى فى الصورة 7

Best Fiverr Guide
صورة 7

وهنلاقى فى القايمة هنا اننا ممكن ننشر على الصفحة الشخصية لاحد الاصدقاء او ننشر فى جروب انت عضو فيه او فى ايفينت او حتى فى رسالة خاصة لصديق او مجموعة اصدقاء. هنضغط على Share to Group.

اكتب اسم الجروب وبعدين اضغط على Post to Facebook.

هتظهر لك الشاشة اللى فى الصورة 8

Best Fiverr Guide
صورة 8

عشان تنشر على باقى المجموعات من الصورة اللى فاتت هندوس على السهم اللى على يمين الشاشة بجوار ال Gig ونختار share. هتفتحتلنا صفحة ال Gig نفسها هندوس على لوجو الفيس بوك على اليمين هيفتحلنا نفس الشاشة اللى فى صورة 7 تانى وهنكرر نفس اللى عملناه بعد كدة مع تغيير اسم الجروب كل مرة لحد ما نكون نشرنا فى كل الجروبات اللى احنا عايزينها.

للنشر على صفحتك الخاصة اللى انت ادمن فيها هتروح للبوست نفسه فى اى جروب من دول او من صفحتك الشخصية ان كنت نشرته عليها وتعملها شير وتختار Share in بنفس الطريقة هيظهرلك اختيار جديد اللى هو share in a page you manage. دوس عليه واختار الصفحة اللى هتنشر عليها ودوس Post to Facebook.

معلومة: يفضل انك تنشر الاول على صفحتك الشخصية ومنها تنشر على صفحة الفيس بوك اللى انت عملتها لنشر الخدمة عليها ومن الصفحة تبتدى تنشر على الجروبات اللى اتن عايزها. بكدة هتقدر تجيب تفاعل اكتر لصفحتك وده هيساعد انها توصل لعدد اكبر من مستخدمى الفيس بوك .

معلومة مهمة: سياسة الفيس بوك بتسمحلك بالانضام ل  6000 جروب بحد اقصى. لكن لو عملت حساب جديد متبعتش اكتر من 10 طلبات انضمام لجروبات فى اول مرة لحد ما يترد عليهم ومع الوقت ابعت اكتر عادى. لو بعت عدد كبير من طلبات الانضمام لمجموعات ممكن الاكاونت بتاعك يتوقف اسبوعين لو كان جديد. اما لو قديم مفيش مشكلة.

النشر على جوجل +

هنضط على شعار جوجل اللى على اليمين هتظهر الشاشة اللى فى الصورة هنضغط Post.

Best Fiverr guide
صورة 9
اانشر على تويتر

بالضغط على شعار تويتر هتظهر الصورة 10 وهنا ممكن نعدل على النص الموجود باضافة هاش تاج (#) للكلمات اللى ممكن المستخدمين يبحثوا عنها وليها علاقة بالخدمة بتاعتنا زى Logo مثلا نحط قبلها #. والهاش تاج اللى ميعرفش وظيفته فى تويتر هو اداة لما بتستخدمها بيتم وضع التويتة بتاعتك فى قايمة بعنوان الكلمة اللى حطيت قبلها الهاش تاج. يعنى لو كتبت فى موقع تويتر فى صندوق البحث (Fiverr#) هتظهرلك كل التويتات اللى اتكتب فيها نفس الهاش تاج ده. وبكدة انت بتساعد الناس اللى بتدور على اى حاجة متعلقة بخدمتك انهم يشوفوا اعلانك او تويتك من ضمن نتايج البحث. عسي ان يكون منهم من يبحث عن حد يصممله لوجو او يقدمله خدمتك ايا كان نوعها.

Best Fiverr Guide
صورة 10

كدة يبقى خلصنا الجزء الثالث وإلى أن ألقاكم فى الجزء الرابع الخاص بسحب الأرباح من الموقع.

دمتم فى رعاية الله

وتمنياتى بالتوفيق والنجاح للجميع.

أتمنى إن وجدتم أى معلومة أضافت إلى علمكم شيئا من هذا الدرس ألا تنسونا بالدعاء.

رابط الجزء الأول (مقدمة عن الموقع وفتح حساب جديد عليه)

رابط الجزء الثانى (إنشاء خدمة جديدة مميزة)

 

2 Replies to “سلسلة دروس كيفية الربح من الانترنت بالعمل على موقع فايفر (الجزء الثالث)”

أضف تعليقاً