العمل من البيت على الانترنت والربح الحقيقي × وهم الربح السريع بدون تعب


ايه هيا الاستفسارات اللى ممكن تيجي على بالك أول مال ما بتسمع عن فكرة انك ممكن تشتغل عن طريق الانترنت من بيتك؟
 
ديه اكثر الاستفسارات تكرارا اللى سمعناها كإجابة عن السؤال ده :-

يعنى ايه فريلانسرز؟

قبل ما نعرف المعنى لازم نفرق بين حاجتين مهمين:
الأولى هى المهن الحرة واللى تعتبر عمل حر بطبيعتها زى اعمال البناء والتشطيب والمحاماه وغيرها من الاعمال التى لا يوجد فيها ربط دائم بين صاحب العمل والعامل وبيميزها زى ما قلنا ان العامل مش مرتبط بنفس العميل يعنى يقدر يشتغل لعملاء كتير فى نفس الوقت بحرية تامة سواء لاعمال صغير او عقود متوسطة او حتى طويلة الامد لكن فى النوع ده العامل بيلتزم بالتواجد الفعلى فى اماكن العمل فى اوقات معينة فالمحامى مثلا لازم يترافع فى المحكمة فى القضايا ومهندس الديكور لازم يشرف بنفسه على تنفيذ التصميم.
التانية هى العمل الحر عن طريق الانترنت واللى بينطبق عليها نفس مواصفات الأولى بس بيزيد عليها حاجتين مهمين هما عدم التزام العامل بأداء العمل من مكان محدد والاهم من ده ان ناتج العمل لازم يكون قابل للتسليم عن طريق الانترنت. بمعنى اخر العامل او هنسمية هنا الفريلانسر يقدر يشتغل من اى مكان يعجبه سواء من بيته او من على كافية مثلا او كو-ووركينج سبيس او حتى فى الطيارة او على البحر فى المصيف والميزة التانية ان العامل مش مضطر يشوف العميل خالص لدرجة ان فى كثير من الاحيان بنعمل شغل لناس واحنا منعرفش هل العميل ده رجل أم امراة 🙂 . وده هو اللى بنتكلم عليه انهردة
 

يعنى ايه فريلانس؟

زى ما عرفنا من شوية نقدر نقول العمل الحر اللى يعنينا هنا هو كل عمل قابل انه يتنفذ عن بعد من اى مكان وقابل للتسليم عن طريق الانترنت باى شكل كان.
 

ايه قصة الشغل على الانترنت؟

قصة الشغل على الانترنت والعمل الحر بدأت من فترة طويلة أوى بسبب عوامل اقتصادية واجتماعية واسباب اخرى. من اهم الاسباب اللى ادت لنمو النوع ده من الاعمال على الانترنت هى الفجوة الاقتصادية الكبيرة جدا بين الدول الاقتصادية الكبرى والدول الفقيرة. وعشان مندخلش فى شرح معقد هنمثل الموضوع ده بمثال واضح جدا اكيد كلنا عندنا خلفية كويسة عنه. وهو فكرة ان معظم مصانع انتاج الدول الكبرى تم نقلها خلال ال 20 سنة اللى فاتت لدول شرق اسيا الفقيرة اللى فيها عمالة رخيصة. وهنا حط 100 خط تحت كلمة عمالة رخيصة. فلاحظنا ان شركات تصنيع السيارات اليابانية كتير منها نقل المصانع بتاعته للصين شركات صناعة الاحذية الرياضية من ماركات زى اديداس ونايك مصانعها فى اندونيسيا ودول شرق اسيا. نفس السبب اللى دفع الشركات العملاقة انها تتجه إلى الدول الفقيرة للاستفادة بالعمالة الرخيصة هو السبب اللى خلى الشركات ديه وغيرها يلجأوا لمفهوم اقتصادى جديد اسمه ال Outsourcing . بس الفرق هنا ان انا كشركة كبيرة مش محتاج العامل ييجى عندى او انى اروحله بلده عشان ينتجلى منتج. انا محتاج حاجة ممكن يعملها من عنده وانا فى مكانى ويبعتهالى عالانترنت وانا ابعتله فلوسه على حسابه فى البنك. يعنى مثلا انا مصنع ملابس وكنت بدفع لمصمم الرسومات اللى بيعملى رسومات التيشيرتات 20$ فى الساعة لانه من امريكا وانا امريكى ومصنعى فى امريكا. لو فرضنا ان العامل الامريكى ده هيعملى التصميم فى 5 ساعات يعنى هدفعله 100$ ده غير انه هيشتغل فى مكان انا هوفرهوله فهحتاج اوفرله جهاز كمبيوتر وانترنت وهيستهلك كهربا ولو عينته عندى ممكن احتاج أأمن عليه كمان.
مبدا ال outsourcing فى الحالة ديه حل المشكلة ووفر عليا 90% من المصاريف لانى ممكن اطلب من اى فريلانسر من الهند او اى دولة فقيرة انه يعملى التصميم ده وادفعله 5$ فقط وهيعمله من الهند مش محتاج اجيبه عندى ويكلفنى مصاريف انترنت وكهربا وغيره وهيبعتلى التصميم على الانترنت وادفعله فلوسه وهيكون مبسوط لان ال5$ بالنسبة للعملة الهندية مبلغ كويس.
 
الفكرة بدأت مع بعض الشركات العاملة فى مجال تكنولوجيا المعلومات واتوسعت لدرجة ان نسبة كبيرة جدا من الشركات فى امريكا بقت بتعتمد بشكل كبير على الفريلانسرز فى كثير من اعمالها. ونفس الامر للشركات الكبيرة فى العالم المتقدم كله بل والافراد كمان.
 
حتى ان الاحصائيات بينت ان الاعتماد على العمل الحر عبر الانترنت من المتوقع ان يزيد بنسبة كبيرة جدا خلال السنوات القادمة. واللى وصل بالفعل فى بعض الدول انه يغطى اكتر من 40% من الاعمال الموجودة فى السوق بيتم انجازها عن طريق العمل الحر عبر الانترنت.
 

اشتغل على الانترنت ازاى اصلا وهاخد فلوسي من مين ومن فين وازاى؟

بعد ازدهار مبدأ ال outsourcing فى الدول المتقدمة ظهرت مشكلة كبيرة كانت عائق كبير امام نمو الفكرة. الثقة والإتمان، ببساطة شديدة صاحب العمل محتاج يضمن انه هيستلم شغله قبل ما يدفع اى فلوس فى نفس الوقت اللى الفريلانسر فيه محتاج يضمن ياخد فلوسه حتى قبل ما يبدأ شغل.
لحل المشكلة ديه بدأ احد رواد الاعمال بتصميم موقع كان بيستخدمه فى البداية للتحويلات المالية للفريلانسرز اللى بيعتمد عليهم لكن مع الوقت فكر انه يستخدم الموقع بتاعه عشان يبقى منصه للتواصل ما بين العملا والفريلانسرز تحقق عنصر الثقة والإتمان. والموقع هنا قام بدور شبيه لدور البنك فهو بياخد من العميل الفلوس قبل ما الشغل يبدا ويخيلي الفلوس عنده لحد الشغل ما ينتهى بحيث العميل يبلغ الموقع بانتهاء الشغل لتحويل الفلوس للفريلانسر وهنا لو حصل خلاف الموقع بيحول للفريلانسر فلوس الشغل طالما التزم بكل المتفق عليه فى الاتفاق مع العميل اللى بيكون من خلال الموقع نفسه.
 

طيب هل الموضوع ده مربح فعلا ؟ يعنى ممكن اكسب كام من الشغل ده ؟

نفس السؤال ده سألته لنفسي قبل ما أبدأ شغل وعشان اعرف الاجابة بنفسي لانى مش بصدق كلام اى حد بسهولة دخلت على بعض المواقع اللى بينزل عليها شغل زى ده وفتحت بروفايلات ناس عليهم بيعملوا شغل بشكل مستمر واكتشفت ان فيه ناس كتير متفرغه فقط للشغل على الانترنت على المواقع ديه. حتى الشغلانات اللى محدش يتخيل انها ممكن تحقق ربح كبير زى الداتا انترى مثلا لقيت فريلانسر واحد على موقع اسمه فريلانسرز دوت كوم بيدخل ما شاء الله متوسط 3500$ فى الشهر وكان باكستانى ولغته الانجليزى متوسطه ومعاه مؤهل متوسط. طبعا انا مشهحسب الفلوس ديه تساوى كام بالمصري وهسيبلكم انتم المهمة ديه.
 

شغل ايه اللى ممكن يتعمل على الانترنت ؟

الحقيقة فى البداية السؤال ده بيكون صعب اوى. خصوصا لما تتخيل انك بتعمل شغل لعملا اغلبهم من دول متقدمة زى اليابان والولايات المتحدة وانجلترا والمانيا. انا شخصيا قلت لنفسي “طيب يعنى هو انا كمواطن متعلم فى دولة تعليمها مش على الخريطة اصلا هعمل ايه مفيد لواحد متعلم تعليم فى دولة ترتيبها فى اول 10 فى كاحسن تعليم ناهيك عن باقى عناصر التقدم الصناعى والتجارى والاجتماعى و و و ؟؟؟”
لكن عايز اقولكم ان السؤال ده تحول لاندهاش بعد شهور قليله من بدايتى فى المجال. اندهاش بسبب الحاجات العجيبة اللى الواحد مكنش يتخيل انه ممكن ياخد فلوس عشان يعملها لانه كان عادة بيعمل اصعب منها بكتير مجرد خدمة لواحد صاحبه او عشان يحل مشكلة فى حياته او شغله.
وهدى امثلة بسيطة هنا يعنى مثلا اول شغلانه عملتها كانت عبارة عن انى انزل برنامج اندرويد على الموبايل بتاعى واصور البرنامج على الموبايل سكرين شوت وابعته للعميل وهو يبعتلى 5$ وفعلا مصدقتش لحد ما العميل دفع الفلوس وبرضوا مصدقتش لحد ما عملت شغل تانى وحولت اول تحويل فلوس ليا واخدتهم فى ايدى وبرضوا لسه مصدقتش 🙂 . من بعض الشغل الغريب اللى عملته انى جاوبت على استبيان من اللى ممكن اى واحد فينا يقف يملا عشرة منه وهو فى اى مكان عام بدون اى مقابل. كان استمارة على صفحة على الانترنت دخلت جاوبت على الاسئلة اللى فيها فى عشر دقايق واخدت كود بعته للعميل بعتلى الفلوس.
مع الوقت ادركت ان الحاجات ديه عادية فى الغرب عموما بسبب اختلاف الثقافات لان السياسة او المبدأ ف ىالغرب عادة ان مفيش اى حاجة ببلاش كل حاجة بمقابل حتى اتفه الامور اللى احنا هنا بنعتبرها روتين يومى وواجب علينا وميصحش نطلب مقابل عليها.
 
الامثلة اللى اتكلمت عليها لحد دلوقتى واضح جدا انها مشمحتاجة اى مهارة خاصة.
لكن ده ميعتبرش شغل متوفر بشكل كبير نقدر نعتمد عليه بس هتندهش اكتر لما تعرف ان انواع الشغل اللى ممكن تعملها على الانترنت هى اكتر من 999 نوع وفقا لتصنيف واحد بس من مواقع العمل الحر وانهم بيتقسموا عموما ل 12 تصنيف عام منهم الجرافيكس والميديا والتسويق والبرمجة.
 

طيب مش ممكن يتنصب عليا وماخدش فلوسي؟ واضمن ازاى حقي؟

فى مجالات العمل عموما سواء على الإنترنت أو فى العمل الوظائف العادية بيكون العامل معرض للنصب والإحتيال عليه أو أن يتم إستغلاله إن لم يتخذ الإحتياطات الكافية للتأكد من عدم حدوث ذلك. ولمعرفة طرق ومواقع النصب التى من الممكن أن تتعرض لها أثناء رحلة عملك على مواقع العمل الحر عبر الإنترنت إقرأ هذا الموضوع والذي أفردنا له مقالا خاصاً لأهميته.

هل لازم اكون قوى فى الانجليزى؟

لا. الاجابة باختصار لا خصوصا بعد ما ظهر فى السنوات الاخيرة بعض المواقع باللغة العربية فقط للعمل الحر مثل موقع خمسات موقع مستقل التابعين لشركة حاسوب.
ولو كان مستواك متوسط فى الانجليزى تقدر ايضا تشتغل على المواقع الاجنبية. لكن لازم تكون ايضا فاهم ان فرص الشغل على الانترنت على المواقع الاجنبية اكتر بكتير لان عدد العملاء على المواقع الاجنبية من كل دول العالم اكتر باضعاف العدد الموجود على المواقع العربية.
 

– هل لازم اكون محترف فى استخدام الكمبيوتر عشان اعرف اشتغل على الانترنت؟

قلنا قبل كدة ان فيه اكتر من 999 نوع شغل ممكن تعملهم كفريلانسر. في منهم انواع كتير مش محتاجة منك اى خبرة مع الكمبيوتر زى مثلا حاجة اسمها التفريغ الصوتى “مجرد انك تسمع تسجيل وتكتب اللى فيه على ملف وورد” أو مثلا شغل اسمه التعليق الصوتى اللى مش محتاج منك اكتر من معدات مناسبة للتسجيل بجودة عالية.
 

– طيب انا معيش اى شهادات خبرة او كورسات ينفع اشتغل على الانترنت؟

اجمل حاجة فى الشغل على الانترنت ان كل الشهادات اللى انت حاصل عليها ملهاش اى قيمة على مواقع العمل الحر يعنى ممكن واحد يكون لا يحمل اى شهادات يكسب 10 اضعاف اخر معاه 20 شهادة . المعيار الوحيد هنا هو الالتزام والتفانى فى العمل والاتقان والمهارات والخبرات.
 

– طيب انا لسه مخلصتش الجامعة ينفع اشتغل على الانترنت؟

حتى لو انت لسه فى ثانوى تقدر تشتغل على الانترنت القيد الوحيد هو السن القانونى عشان تقدر تفتح حساب بنكى تستلم عليه ارباحك وحتى القيد ده ليه حلول لان دلوقتى فيه طرق تقدر تسحب بيها فلوسك منغير ما يكون ليك حساب فى اى بنك حتى ويكفى يكون معاك بطاقة بس او باسبور.
 
– انا مؤهل متوسط فيه شغل مناسب ليا على الانترنت؟
الشغل على الانترنت يقدر يقوم بيه اى حد بيعرف يقرأ ويكتب ولا قيمة للشهادات فيه طالما عندك اى مهارة على الكمبيوتر مهما كانت بسيطة ممكن تستغلها ومن ثم تطورها. 
 

– طيب انا خريج طب بشرى فيه شغل مناسب ليا ؟ طيب انا خريج هندسة أو اعلام أو اداب او السن او ….. فيه شغل ممكن اعمله على الانترنت مناسب لتخصصي؟

مهما كان تخصصك او دراستك فمجالات العمل الحر تشمل كل التخصصات والمجالات ايا كانت. فالطب مثلا يوجد اعمال مناسبه له مثل كتابة المقالات الطبية او الترجمة الطبية او التفريغ الصوتى الطبي. خريج الهندية من الممكن ان يقوم باعداد التصميمات على برامج التصميم ثلاثية او ثنائية الابعاد وهو من الاعمال المطلوبة بكثرة على مواقع العمل الحر. وهكذا حتى المحاسبين لهم وظائف كثير يمكن القيام بها عن بعد.
 

– طيب انا عندى نونو لسه صغنن ومش بتحرك من البيت فيه شغل مناسب ليا على الانترنت اعمله من البيت؟

معظم انواع الشغل بتحتاج التركيز لفترة طويلة وده لا يناسب اى أم عندها اطفال لسه صغيرين لانهم مشبيناموا اكتر من ساعتين اساسا. لكن فيه انواع شغل كتير بتناسبهم برضوا منها مثلا الداتا انترى وادارة صفحات السوشيال ميديا وحاجات تانية كتير. 
 

– طيب انا بسافر كتير هل ينفع اشتغل على الانترنت كدة؟

ديه اصلا احسن مميزات العمل الحر لانك ممكن تعمل شغلك من اى مكان. طالما انت معاك لاب توب وعليه كل البرامج اللى انت بتشتخدمها اتحرك بيه فى اى مكان واعمل شغلك من اى مكان يعجبك.
 

– معنديش كمبيوتر اصلا ينفع اشتغل من الموبايل او التابلت فقط؟

معظم الناس هتقولك لا مينفعش وانا هكون واقعى واقولك ان الاصل فعلا انه مينفعش. لكن كل قاعدة ليها استثاء وفيه بالفعل شغل كتير بيناسب الموبايل او التاب منهم اول شغلانه انا عملتها وذكرتها فى الاجابة على اول سؤال فوق 🙂 وغيرها كتير زى Mobile app testing مثلا. الانواع ديه من الشغل مشبتكون متوفرة بكثرة لكن لو انت مفيش قدامك اى فرصة تمتلك جهاز كمبيوتر هيكون اوبشن وحيد ليك. ولو تقدر تجيب اي فون هتلاقى فرص شغل اكتر لانه مش مع معظم الناس ومصممي البرامج دايما بيدوروا على حد معاه ايفون يجرب برامجهم كشغل بمقابل على مواقع العمل الحر. 
 

– هجيب منين طيب شغل على النت اصلا ؟

فيه اكتر من 250 موقع للعمل الحر على الانترنت بالانجليزى وبالعربى وعلى كل شكل وكل لون نقى اللى يعجبك منهم واشتغل عليه.

 

– ايه هى المواقع اللى ممكن اشتغل عليها ؟

اشهر المواقع اللى ممكن تشتغل عليها على الانترنت وتعتبر من اقدمهم
موقع ابورك www.upwrok.com وده كان عبارة عن موقعين متنافسين واحد اسمه odesk والتانى كان اسمه elance ومع الوقت اصبح ليهم منافس تالت قوي فاتحدوا هم الاتنين عشان يطلعوه من المنافسه ونجحوا فى ده الى حد كبير.
موقع www.freelancers.com وده المنافس القوى اللى لسه كنا بنتكلم عليه ورغم المنافسة الكبيرة من موقع ابورك لكن لازال موقع فريلانسر بيقدم مميزات لسه مشموجودة فى ابورك زى مثلا المسابقات ونظام اختبارات المهارات المتقدم.
موقع فايفر www fiverr.com وده موقع مش قديم اوى لكنه شغال من 2004 تقريبا وليه مميزات كتير عن الموقعين اللى فاتوا.
موقع جورو www.guru.com هو موقع هندي الاصل لكنه عليه شغل كويس وتصميمه ممتاز.
موقع بيبول بير هاو www.peopleperhour.com ده موقع بتملكه شركة انجليزية وبيتميز انه بياخد عمولة اقل من معظم المواقع التانية ولو انه بدأ يغير من سياسته مؤخرا برفع نسبه العمولة.
وفيه عشرات من المواقع المماثلة وعشرات ايضا من مواقع متخصصة فى مجالات محددة فقط.
وديه بعض المواقع العربية للعمل الحر والاشهر
موقع خمسات https://khamsat.com وهو يعتبر تقليد شبه حرفى لموقع فايفر بس بالعربي
موقع مستقل https://mostaqel.com وهو يعتبر تقليد لموقع ابورك باللغة العربية
 

– طيب هل أقدر انى اعتمد على الشغل على الانترنت كشغل اساسي ويحل محل الوظيفة الثابته؟

الحقيقة الاجابة على السؤال ده تختلف من واحد للتانى. يعنى فيه نوع من الناس بيحدد نمط حياته ومصاريفه بناءا على دخله فبيصرف كل قرش بيدخله حتى لو بيكسب مليون جنية في الشهر ممكن يبقى مديون كمان.
زى ما قلنا قبل كده انه سهل جدا انك فى خلال من 6 شهور لسنه توصل دخلك ل 500$ على الاقل فى الشهر وده احسن من اى مرتب ممكن تاخده من اى وظيفه كشاب بل وتقدر تزود دخلك عن كدة بكتير لو استمريت في تطوير مهاراتك.
لكن اهم شيء هنا انك توفر الائتمان اللى بتوفرهلوك الوظيفة الدايمة. بمعنى انك كفريلانسر ملكش تامين طبي ولا ليك تامينات اجتماعية . يعنى مفيش حد هيديلك فلوس لما تطلع على المعاش. يبقى لازم تعمل حسابك لو هتقرر ان ده هيبقى مصدر دخلك الاساسي والوحيد انك هتستقطع منه مدخرات للتامين الطبي ومدخرات للانفاق بعد بلوغ سن التقاعد واقصد هنا لما توصل لسن متبقاش قادر تشتغل فيه.
وهنا بقترح ان لو دخلك 300$ فيما فوق انك تستقطع منهم على الاقل 50$ كل شهر بعد اول سنة تبتدى تحولهم لوديعه عشان متجيش جمبهم. ولو بتاخد فلوسك بالدولار يبقى نصيحة خليهم بالدولار زى ما هما متحولهمش وافتح وديعتك بالدولار عشان متخسرش فلوسك فى اى نقلة اقتصادية تحصل زى ما حصل عند تعويم الجنية فى مصر او اى دولة عملتها قيمتها ضعيفة أمام الدولار.
 
 
 

أضف تعليقاً